Şəxsiyyət vəsiqəsini dəyişmək üçün nə lazımdır?
Müəllif : Fuad Muxtarov | Faydalı olar | 07-05-2010 | Oxunub: 805
2
Şəxsiyyət vəsiqəsini dəyişməyin səbəbi müxtəlif ola bilər. Ümumiyyətlə, Azərbaycan Respublikasının vətəndaşlarına 25, 35, 50 yaşına çatdıqda, həmçinin onların soyadı, adı, atasının adı, yaşayış yeri, ailə vəziyyəti və hərbi vəziyyəti dəyişdikdə şəxsiyyət vəsiqəsi mütləq dəyişdirilməlidir. Şəxsiyyət vəsiqəsi qeydiyyatda olduğunuz ərazinin Rayon Polis İdarəsində (RPİ-də) dəyişdirilir. Toplanmış lazımı sənədlər RPİ-ə təqdim olunur. Bu sənədlər aşağıdakılardır:
- Köhnə şəxsiyyət vəsiqəsi (kserosurəti ilə)
- 3 ədəd 3×4 sm ölçüdə rəngli foto şəkil
- Mənzilin orderi və ya qeydiyyat vəsiqəsi(Kupça – kserosurəti ilə)
- Yaşayış yerindən ərizə
- Nigah haqqında şəhadətnamə (kserosurəti ilə)
- Hərbi bilet (kserosurəti ilə)
- Tibbi arayış (yalnız birinci dəfə alanlara aiddir)
- Dövlət rüsumunun ödənilməsi haqqında qəbz
Şəxsiyyət vəsiqəsinin dəyişdirilməsi üçün dövlət rüsumu aşağıdakılardır:
- 16 yaşına çatmamış vətəndaşlara şəxsiyyət vəsiqəsi verilərkən dövlət rüsumu alınmır. Yalnız yuxarıdakı sənədlərə doğum haqqında şəhadətnamə (kserosurəti ilə) təqdim olunmalıdır.
- 16 yaşına çatmış Azərbaycan Respublikasının vətəndaşlarına şəxsiyyət vəsiqələrinin verilməsinə görə: üç iş günü müddətinə verildikdə - 5 manat , üç iş günündən sonrakı müddətdə verildikdə - 1 manat
- Azərbaycan Respublikasının vətəndaşlarına 25, 35, 50 yaşına çatdıqda, həmçinin onların soyadı, adı, atasının adı, yaşayış yeri, ailə vəziyyəti və hərbi vəziyyəti dəyişdikdə, şəxsiyyət vəsiqəsinin dəyişdirilməsinə görə - 2 manat
- Şəxsiyyət vəsiqəsi vətəndaşın öz təqsiri üzündən itdikdə və ya yararsız hala düşdükdə, onun dəyişdirilməsinə görə - 3 manat
- Azərbaycan Respublikası vətəndaşlarının eləcə də keçmiş SSRİ vətəndaşlarının qeydiyyata alınmasına görə - 2 manat
Qeyd: Şəxsiyyət vəsiqəsinin vaxtının keçməsinə görə heç bir cərimə ödənilmir. Azərbaycan Respublikası vətəndaşının şəxsiyyət vəsiqəsi haqqında qanununda və İnzibati Xətalar Məcəlləsində belə maddə yoxdur. Yalnız şəxsiyyət vəsiqəsinin və pasportun itirilməsinə və ya qəsdən korlanmasına görə Azərbaycan Respublikasının İnzibati Xətalar Məcəlləsinin 331-ci maddəsinə əsasən 15 manatdan 25 manatadək miqdarda cərimə edilir.
Şəxsiyyət vəsiqəsinin dəyişdirilməsinə görə qanuni formada 5 manata kimi xərc çıxır. Onlardan 2 manat dövlət rüsumu, 2 manat foto şəkil və 1 manat isə sənədlərin kserosurəti üçün ödənilir. Reallıq isə bir qədər başqa formadadır. Reallıqda yuxarıda sadalanan məbləğdən savayı, 5-15 manat arasında əlavə məbləğ sənədləri təhvil verərkən alırlar. Əlbəttə, bu qanunsuzdur, amma bunu reallıqda sübut etmək çox çətindir.
Digər qanun pozuntusu isə sənədin verilmə müddəti ilə bağlıdır. Belə ki, Azərbaycan Respublikası vətəndaşının şəxsiyyət vəsiqəsi haqqında qanunun 4-cü maddəsinə əsasən vətəndaşın şəxsiyyət vəsiqəsi ən geci 10 gün müddətində verilməlidir. Reallıqda isə şəxsiyyət vəsiqəsini 30 gündən sonra almaq olur.
Şərhlərinizi bildirməyi unutmayın!
Populyarlığı: 9%
Müəllifə təşəkkürlər. Ancaq mən başa düşə bilmədim qanun puzuntusu olduğunu niyə sübut etmək çətindir ki?
Qardaş sən deyəsən Azərbaycanda qalmırsan, yoxsa elə sual verməzdin…